Fenomeni El Niño pritet të intensifikohet në muajt e ardhshëm, përpara se të arrijë kulmin në dhjetor, ndërsa ka pothuajse 100% probabilitet që të zgjasë deri në shkurt të vitit 2027, njoftoi Organizata Botërore Meteorologjike (WMO) në buletinin e saj mujor për klimën.
Sipas WMO-së, temperaturat e sipërfaqes së detit në Paqësorin tropikal qendror dhe lindor, në zonën ku përqendrohet fenomeni, mund të arrijnë rreth 3.7 gradë Celsius mbi normalen gjatë periudhës tetor-dhjetor.
Kjo do të ishte dukshëm mbi rekordin e mëparshëm prej 2.6 gradësh Celsius, të regjistruar nga nëntori 2015 deri në janar 2016, duke e bërë El Niñon e këtij viti potencialisht një nga më të fuqishmit që nga të paktën viti 1950.
“Parashikimet tregojnë një probabilitet pothuajse 100% që El Niño të vazhdojë deri në shkurt 2027 dhe potencialisht të jetë një nga episodet më të fuqishme që nga viti 1950”, tha Sekretarja e Përgjithshme e WMO-së, Celeste Saulo.
Ajo theksoi se oqeanet po përmbajnë sasi rekord nxehtësie, duke krijuar kushte për çlirimin e mëtejshëm të energjisë termike në atmosferë.
El Niño është faza e ngrohtë e ciklit natyror klimatik El Niño-Oscilimi Jugor (ENSO), i cili ndikon në motin në pjesë të ndryshme të botës.
Fenomeni zakonisht shoqërohet me rritje të temperaturave globale dhe ndryshime të forta në modelet e reshjeve, duke sjellë thatësira në disa rajone dhe reshje të dendura e përmbytje në të tjera.
Ai shfaqet zakonisht çdo dy deri në shtatë vjet. Ndërkohë, temperaturat mesatare globale në gusht arritën në 16.96 gradë Celsius, duke u barazuar me korrikun e vitit 2023 si muaji më i nxehtë i regjistruar ndonjëherë, sipas Shërbimit të Ndryshimeve Klimatike Copernicus të Bashkimit Evropian.
Studiuesit e Laboratorit të Ndikimit të Klimës në Universitetin e Çikagos kanë paralajmëruar gjithashtu se “super-El Niño” i këtij viti mund të lidhet me deri në 451 mijë vdekje shtesë në mbarë botën gjatë periudhës nga qershori deri në shkurt 2027.
