Deri në 500 shkolla të mesme në Francë mund të mbyllen pjesërisht ose tërësisht ditën e sotme, pas përplasjeve të ditëve të fundit mes policisë dhe nxënësve protestues.
Ministri francez i Arsimit, Edouard Geffray, tha të dielën se mësimi do të pezullohet pjesërisht ose tërësisht në rreth 400 deri në 500 shkolla, pasi kushtet e sigurisë nuk janë përmbushur.
Sipas tij, që nga fillimi i protestave janë djegur ose dëmtuar rëndë 24 shkolla.
Protestat e nxënësve nisën javën e kaluar në Paris dhe më pas u përhapën edhe në qytete të tjera, përfshirë Montpellier, Nantes dhe Marseille. Nxënës dhe protestues të tjerë kundërshtojnë mungesën e mësuesve, mbipopullimin e klasave dhe gjendjen e dobët të disa objekteve shkollore.
Ministri i Drejtësisë, Gerald Darmanin, deklaroi të premten se 735 nga rreth 3,700 shkolla në Francë ishin prekur në një mënyrë apo tjetër nga protestat e dhunshme.
Geffray paralajmëroi se numri i shkollave të prekura të hënën mund të jetë i ngjashëm me atë të së premtes, por tha se autoritetet synojnë një rikthim gradual të mësimit.
Ministri akuzoi gjithashtu aktivistë, veçanërisht nga e majta ekstreme, se kanë ndërhyrë në protestat e nxënësve dhe se kanë nxitur dhunë. Sipas tij, 78 punonjës të arsimit janë lënduar, një shifër që ai e cilësoi si të paprecedentë.
Ndërkohë, Ministri i Brendshëm Laurent Nunez tha se vetëm të premten janë arrestuar 1,747 persona. Sipas AFP-së, që nga fillimi i protestave janë arrestuar më shumë se 5,000 persona, rreth 85 për qind e të cilëve janë të mitur.
Organizatorët kanë bërë thirrje që protestat të vazhdojnë edhe të martën, duke akuzuar qeverinë për mungesë të masave konkrete.
Kryeministri francez Sebastien Lecornu tha të dielën se qeveria po ndërmerr hapa të mëtejshëm për të adresuar problemet me të cilat përballen nxënësit dhe stafi arsimor.
Masat përfshijnë garantimin e vazhdimit të mësimit, përmirësimin e kushteve në shkolla, organizimin më të mirë të orarit mësimor dhe rritjen e transparencës në sistemin e pranimeve në universitete.
