Borxhi kombëtar i Shteteve të Bashkuara ka kaluar për herë të parë shifrën rekord prej 40 trilionë dollarësh, duke shënuar një tjetër moment historik për financat amerikane.
Shifra e paprecedentë u arrit vetëm pesë muaj pasi borxhi amerikan kishte kaluar 39 trilionë dollarë, në mars të këtij viti.
Pesë muaj më herët, në tetor, borxhi kishte arritur në 38 trilionë dollarë. Rritja e borxhit lidhet me shpenzimet e larta federale, përfshirë mbrojtjen, programet sociale si Sigurimet Shoqërore dhe Medicare, si dhe kostot e interesit për borxhin në rritje.
Administrata e presidentit Donald Trump ka deklaruar se është e përqendruar në uljen e shpërdorimeve, mashtrimit dhe abuzimeve në shpenzimet federale, si dhe në përshpejtimin e rritjes ekonomike, me synim përmirësimin e raportit të borxhit ndaj Prodhimit të Brendshëm Bruto (PBB).
Megjithatë, ekspertët paralajmërojnë se rritja e borxhit po ndikon edhe te qytetarët amerikanë, duke rritur kostot e huamarrjes për kreditë e banesave dhe automjeteve, ndërsa bizneset kanë më pak fonde për investime.
Kjo mund të ndikojë gjithashtu në rritjen e çmimeve të mallrave dhe shërbimeve.
Borxhi amerikan është rritur ndjeshëm gjatë disa administratave presidenciale, pasi shpenzimet federale kanë tejkaluar të ardhurat nga taksat. Rritja u përshpejtua veçanërisht gjatë pandemisë së COVID-19, kur qeveria amerikane mori hua në shuma të mëdha për të mbështetur ekonominë dhe rimëkëmbjen, si gjatë mandatit të parë të Donald Trump, ashtu edhe gjatë presidencës së Joe Biden.
