Tensionet mes Shteteve të Bashkuara dhe Iranit janë përshkallëzuar sërish gjatë fundjavës, pas një serie sulmesh ushtarake të ndërsjella në rajonin strategjik të Ngushticës së Hormuzit.
Komanda Qendrore e SHBA-së bëri të ditur se ka ndërmarrë “sulme vetëmbrojtëse” ndaj objektivave ushtarake iraniane, duke argumentuar se veprimi erdhi si përgjigje ndaj aktiviteteve që Uashingtoni i konsideron agresive nga ana e Teheranit, përfshirë rrëzimin e një droni amerikan mbi ujërat ndërkombëtare.
Në reagimin e saj, Garda Revolucionare e Iranit njoftoi se ka goditur një bazë ajrore të përdorur nga forcat amerikane për operacione në rajon.
Autoritetet iraniane paralajmëruan gjithashtu se çdo sulm i ri nga SHBA do të përballet me një kundërpërgjigje edhe më të ashpër.
Ndërkohë, Kuvajti raportoi se sistemet e tij të mbrojtjes ajrore janë vënë përballë sulmeve me raketa dhe dronë, pa specifikuar burimin e tyre apo dëmet e mundshme.
Përshkallëzimi i situatës vjen në një moment delikat për marrëdhëniet mes dy vendeve, teksa negociatat për një marrëveshje afatgjatë duket se kanë hyrë në një ngërç.
Sipas mediave amerikane, presidenti Donald Trump ka kërkuar ndryshime në draft-marrëveshjen e diskutuar me Teheranin, veçanërisht në çështjet që lidhen me statusin e Ngushticës së Hormuzit dhe programin iranian të pasurimit të uraniumit.
