Foto: Qeveria e Malit të Zi / Vlada Crne Gore
Ministri i Financave i Malit të Zi, Novica Vukoviq, ka prezantuar projektbuxhetin për vitin 2026, duke theksuar se kapitali investues është në nivelin më të lartë ndonjëherë – 305 milionë euro.
Sipas tij, pritet ulje e presioneve inflacionare dhe vazhdim i rritjes ekonomike me rreth 3.3 për qind.
Vukoviq njoftoi se gjatë periudhës 2025–2028 do të ketë hua të reja vetëm për projekte kapitale dhe për shlyerjen e borxheve të vjetra.
Në tre vitet e ardhshme parashikohet investim prej 1.1 miliardë eurosh në projekte zhvillimore.
Ai theksoi se për vitin 2026 nevojiten 710 milionë euro për financimin e kapitalit dhe për pagesën e borxheve që maturohen atë vit.
Nga Ministria e Financave u bë e ditur se janë ulur me 20 për qind kontratat me punë të përkohshme në administratën publike, ndërsa trendet ekonomike mbeten pozitive.
Pritet gjithashtu që inflacioni vitin e ardhshëm të bjerë nën 3 për qind.
Drejtoria e Borxhit Publik paralajmëroi se në vitin 2026 maturohet borxh prej 2 miliardë eurosh, për të cilin duhet siguruar financimi me kohë.
Të ardhurat totale të buxhetit për vitin 2026 priten të arrijnë në 3.79 miliardë euro, ndërsa shpenzimet do të rriten në disa sektorë kyç si kujdesi social, financat publike, shëndetësia dhe arsimi.
Në fushën e investimeve publike, për vitin 2026 janë planifikuar 396 projekte kapitale me vlerë totale të vlerësuar prej 9.7 miliardë eurosh.
Pjesa më e madhe e fondeve do të shkojë për infrastrukturë rrugore, përfshirë autostradën Tivar–Bolare dhe një sërë përshpejtimesh në segmentet prioritare. Projekte të reja përfshijnë edhe dokumentacionin për autostradën Adriatiko-Jonian dhe bypass-in e Budvës.
Investimet më të mëdha do të orientohen drejt komunave të veriut të vendit, të cilat përfitojnë pjesën më të madhe të fondeve të planifikuara për vitin 2026.
Projektbuxheti i ri parashikon 3.77 miliardë euro shpenzime, nga të cilat 2.97 miliardë do të sigurohen nga të ardhurat e rregullta, ndërsa pjesa tjetër nga huamarrjet, donacionet dhe depozitat e mbetura nga viti 2025.
