Foto: Reuters
Ministrja e Jashtme gjermane Annalena Baerbock të hënën paralajmëroi homologun e saj kinez se mbështetja e Pekinit për Moskën do të ndikonte në lidhjet mes dy vendeve dhe i kërkoi Kinës të ndihmonte në përfundimin e konfliktit në Ukrainë.
Duke folur në Pekin, Baerbock tha se lufta mbi 1000-ditore po ndikonte në të gjithë botën dhe dënoi rolin në fushëbetejë të trupave të Koresë së Veriut dhe përdorimin e dronëve të prodhimit kinez në konflikt.
“Dronët nga fabrikat kineze dhe trupat e Koresë së Veriut që sulmojnë paqen në mes të Evropës po shkelin interesat tona thelbësore të sigurisë evropiane”, tha Baerbock.
Ministrja gjermane kërkoi një proces ndërkombëtar paqeje për Ukrainën dhe tha se kjo ishte arsyeja e vizitës së saj në Kinë, duke shtuar se çdo anëtar i përhershëm i Këshillit të Sigurimit të OKB-së kishte “përgjegjësi për paqen dhe sigurinë në botë”.
“Presidenti rus jo vetëm që po shkatërron rendin tonë të paqes evropiane përmes luftës së tij kundër Ukrainës, por tani po e tërheq Azinë në këtë luftë, përmes Koresë së Veriut”, tha ajo në një konferencë për shtyp.
Kryediplomatja gjermane u takua me homologun e saj Ëang Yi në një kohë kur Berlini po kërkon të ndërtojë lidhje më të mira me Kinën.
Sipas raportimeve, Ëang i tha homologes gjermane se “si ekonomitë e dyta dhe të treta më të mëdha në botë” Kina dhe Gjermania duhet të përmirësojnë lidhjet mes tyre pavarësisht situatës së trazuar ndërkombëtare”.
