Situata me Covid konfirmoi nevojën për solidaritet global, si kurrë më parë, tha Zëvendëskryeministri i Malit të Zi Dritan Abazoviq, duke folur në hapjen e konferencës shkencore ndërkombëtare “Përmirësimi: njohja, morali dhe gjendja shpirtërore”, e cila është organizuar nga Qendra për Studime Bioetike në Beograd dhe Universiteti i Oksfordit. Në fjalën e tij, Zëvendëskryeministri adresoi çështje etike në kontekstin e pandemisë globale dhe vuri në dukje se është prova më e mirë pse është e nevojshme të vendoset një konsensus minimal për vlerat në komunitetin global, duke deklaruar se procesi i deglobalizimit ka rritur pasigurinë dhe pandemia e Covid-19 ka konfirmuar nevojën për një etikë globale. Abazoviq iu referua tezës së filozofit Peter Sloterdijk rreth “shoqërisë së terrorit” dhe shpjegoi se nëse terrori do të përkthehej fjalë për fjalë si frikë, atëherë situata me COVID do të përshkruante plotësisht shoqërinë e frikës, pavarësisht nga fuqia materiale dhe politike e çdo vendi në botë. Abazoviq mbështeti përpjekjet e studiuesve, veçanërisht në fushën e mjekësisë, duke theksuar se bioetika duhet të zhvillohet paralelisht me zbulimet e reja teknologjike. Ai vuri në dukje se në një kuptim global, është e vështirë të imagjinohet se çdokush mund të zgjidhë problemet e veta, dhe se është e nevojshme të afirmohet mendimi teorik që një ditë mund të vijë në jetë në praktikë. “Asnjë shoqëri nuk mund të mbijetojë pa vlera themelore, e cila vlen edhe për bashkësinë globale,” përfundoi Abazoviq.
