Në ambientet e Ministrisë së Arsimit, Shkencës dhe Inovacionit u nënshkrua solemnisht Marrëveshja për dhurimin e kompjuterëve laptop ndërmjet Ministrisë dhe kompanisë “One”.
Ministrja e Arsimit, Shkencës dhe Inovacionit Angjella Jakshiq-Stojanoviq ka falënderuar kompaninë One për këtë donacion të vlefshëm për mësimdhënësit.
“Bashkëpunimi ynë ka vazhduar për një kohë të gjatë dhe jam krenare për gjithçka që kemi arritur së bashku. Kompania One u tregua edhe një herë një partner i besueshëm, jo vetëm në fushën e telekomunikacionit, por edhe si dikush që sheh rëndësinë e arsimit dhe përmirësimit të kushteve të punës së mësuesve tanë”, theksoi ministrja.
Siç njofton Ministria e Arsimit, digjitalizimi i arsimit është një hap kyç drejt modernizimit të mësimdhënies dhe ky donacion u mundëson mësuesve të përshtaten më mirë me nevojat e mësimit modern dhe t’u qasen nxënësve në një mënyrë të natyrshme dhe të afërt.
Ministrja theksoi se ky donacion do të kontribuojë dukshëm në qëllimin e përbashkët – krijimin e kushteve më të mira për mësim dhe aftësimin e çdo nxënësi që të zhvillojë potencialin e tij në mënyrën më të mirë të mundshme.
Drejtori ekzekutiv i çështjeve ligjore, rregullatore dhe korporative në kompaninë One, Srgjan Shishiq, theksoi se ky donacion nuk është vetëm një shprehje e përkushtimit ndaj arsimit, por edhe dëshirës për t’u siguruar fëmijëve mjetet dhe burimet e nevojshme për të pasur sukses në botën moderne.
