Ministria e Administratës Publike prezantoi të gjitha të dhënat për numrin e të punësuarve në administratën publike, krijoi një model donatorësh që tregon mbështetjen financiare për reformën e administratës publike, aplikoi instrumentin evropian të menaxhimit të cilësisë, ngriti një regjistër të organeve dhe institucioneve shtetërore, përmirësoi ndjeshëm procesin e digjitalizimit dhe forcoi ekosistemin kibernetik.
Kështu ka bërë të ditur ministri i Administratës Publike, Marash Dukaj, në konferencën për rezultatet e 100 ditëve të Qeverisë së 44-të të Malit të Zi, duke thënë se Ministria në periudhën e kaluar është duke punuar në përmirësimin e të gjitha fushave në kompetencë të saj, duke nxitur bashkëpunimin me partnerët dhe miqtë.
“Qëllimet që kemi arritur në këtë periudhë të shkurtër janë hartëzimi i mbështetjes financiare për reformat e administratës publike, vizualizimi i fushës së administratës publike dhe numri i punonjësve, aplikimi i një kuadri të përbashkët vetëvlerësimi – modeli CAF, shpallja e formimit të qendrave burimore për OJQ-të, zbatimi i projektit të administrimit pa letra, përmirësimi i CIRT-it të qeverisë, zbatimi i organit të ri certifikues, përmirësimi i kuadrit legjislativ, vetëqeverisjeve lokale, si dhe krijimi i Regjistrit të organeve dhe institucioneve shtetërore”, ka thënë Dukaj.
Ai theksoi se përmirësimi i administratës publike është përgjegjësi e Ministrisë, por se në atë proces duhen qytetarë aktivë “që të na inkurajojnë që të jemi më të mirë, më efikas dhe në përputhje me nevojat e tyre”.
“Qëllimi ynë është i përbashkët – të jemi të hapur ndaj ndryshimeve, të zhvillojmë punën ekipore, të respektojmë dallimet, të përmirësojmë kompetencat në përputhje me zhvillimin e përshpejtuar teknologjik. Vetëm kështu do të kemi fuqi për të arritur qëllimet kyçe që nuk janë lehtësisht të arritshme, por janë rruga që kemi zgjedhur”, bëri të ditur ministri.
Ai shpjegoi se në bashkëpunim me komunitetin akademik, Universitetin e Malit të Zi, Dhomën e Tregtisë, Shoqatën e Menaxherëve, Unionin e Punëdhënësve, si dhe kompanitë e angazhuara në aktivitete të ngjashme, ministria që ai drejton realizon aktivitete të rëndësishme të përcaktuara në planet e veprimit.
“Partnerët dhe miqtë tanë ndërkombëtarë kontribuojnë në suksesin e prioriteteve tona në mënyrën më të mirë të mundshme,“ tha Dukaj.
