Foto: table.media
Presidentja e Parlamentit Evropian, Roberta Metsola, i ka përcjellë urimet Kuvendit të Malit të Zi me rastin e shënimit të 120-vjetorit të parlamentarizmit, duke riafirmuar mbështetjen e institucioneve evropiane për integrimin e vendit në Bashkimin Evropian.
Në një videomesazh, Metsola theksoi rëndësinë e parlamenteve në mbrojtjen e demokracisë, paqes dhe stabilitetit, duke vlerësuar se ato kanë rol kyç në përfaqësimin e qytetarëve dhe në formësimin e së ardhmes evropiane.
Ajo rikujtoi edhe vizitën e saj në Kuvendin e Malit të Zi në qershor të këtij viti, kur konfirmoi se vendi i Malit të Zi është në Bashkimin Evropian.
Metsola theksoi se Parlamenti Evropian do të vazhdojë bashkëpunimin e ngushtë me Kuvendin e Malit të Zi dhe mbështetjen për procesin e integrimit evropian, duke nënvizuar se rruga drejt anëtarësimit kalon përmes parlamenteve.
Në fund, ajo përgëzoi Malin e Zi për 120 vjet parlamentarizëm, me mesazhin: “Le ta shkruajmë së bashku kapitullin e ardhshëm të demokracisë evropiane.”
