Ngecja në rrugën evropiane nuk është më një mundësi, tha Kryetari i Parlamentit të Malit të Zi, Alleksa Beçiq dhe theksoi se një miratim më dinamik i standardeve evropiane do të çojë në mbylljen më të shpejtë të të gjithë kapitujve negociues dhe anëtarësimin përfundimtar të Malit të Zi në Bashkimin Evropian (BE). Sipas Kuvendit, ai mori pjesë në një takim virtual me raportuesin e Parlamentit Evropian për Malin e Zi, Tonino Piculla dhe bashkë-kryetarin e Komitetit Parlamentar të Stabilizim-Asociimit BE-Mali i Zi (POSP), Vlladimir Bilçik. Në konferencën online morën pjesë Kryeministri Zdravko Krivokapiq dhe Zëvendëskryeministri Dritan Abazoviq. Beçiq theksoi se zgjedhjet e fundit parlamentare në Mal të Zi ishin historike dhe se si qeveria ashtu edhe opozita janë përgjegjëse për ndryshimin e qeverisë. “Ne do të bëjmë gjithçka për të përshpejtuar rrugën evropiane të Malit të Zi, për të cilën jemi zotuar me Marrëveshjen e tre udhëheqësve, të cilët po marrin pjesë në këtë konferencë online sot,” tha Beçiq. Duke folur për përparësitë e mbledhjes së re të Kuvendit, Beçiq deklaroi se një nga qëllimet kryesore është afirmimi i parlamentit si një vend qendror i jetës socio-politike, në të cilën të gjitha subjektet politike do të punojnë së bashku për të arritur një marrëveshje mbi çështjet e rëndësishme për të ardhmen e Malit të Zi. Kryetari i Parlamentit të Malit të Zi, informoi të pranishmit në lidhje me përparësitë e thirrjes së re të Kuvendit dhe vuri në dukje se do të punojë në forcimin e rolit legjislativ, mbikëqyrës dhe të kontrollit, si dhe reformën e gjyqësorit dhe reformën gjithëpërfshirëse të legjislacionit zgjedhor. Ai shtoi se janë ndërmarrë hapa konkretë për të formuar një Komitet për Reformën Gjithëpërfshirëse të Legjislacionit Zgjedhor. Në fund, falënderoi për ndihmën financiare të dhënë nga BE për Malin e Zi për shkak të pasojave të shkaktuara nga koronavirusi.
