Kryeministri i Malit të Zi Dritan Abazoviq tha në vënien e gurthemelit për rindërtimin dhe zgjerimin e objektit të Fakultetit të Arkitekturës se ky është gurthemeli për dijen dhe shkencën në Mal të Zi.
“Studentët e Fakultetit të Arkitekturës dhe profesorët meritojnë të kenë hapësirë adekuate. Ky është një gurthemel i dijes dhe shkencës në Mal të Zi. Dija është kapitali më i madh dhe jam i sigurt se studentët në ndërtesën e re do të kenë ide më të mira, dhe unë apeloj në emër të Qeverisë që të ketë hapësirë më të mirë të kujdesit”, tha Abazoviq.
Ai tha se çdo investim në shkencë dhe dije kthehet shumëfish.
“Gjithçka që investojmë në arsim është një investim që shpërblehet. Unë dua të shoh projekte të mëdha infrastrukturore në të ardhmen,” tha Abazoviq.
Me rindërtimin dhe zgjerimin e planifikuar, pas 17 vitesh, Fakulteti i Arkitekturës do të zgjerojë kapacitetin hapësinor nga 800 ekzistues në rreth 5000 metra katrorë.
“Qeveria e ka përkrahur këtë projekt përmes Buxhetit Kapital në vlerë prej 3.5 milionë euro. Pas kryerjes së procedurës së prokurimit publik vitin e kaluar, përmes Drejtorisë për Projekte Kapitale, kjo ngjarje ceremoniale shënon fillimin e punës për realizimin e këtij projekti,” thuhet në njoftim.
