Foto: predsjednik.me
Presidenti i Malit të Zi, Jakov Millatoviq, ka propozuar krijimin e një mekanizmi shtetëror urgjent dhe të detyrueshëm për luftimin e dhunës mes bashkëmoshatarëve në shkolla.
Ai kërkon hartimin e një Protokolli Kombëtar që do të përcaktojë qartë përgjegjësitë e shkollave, policisë, qendrave për punë sociale, institucioneve shëndetësore dhe ministrive në rastet e dhunës fizike, psikologjike, verbale dhe digjitale.
Millatoviq theksoi se asnjë fëmijë nuk duhet të përballet i vetëm me dhunën dhe se çdo rast duhet të marrë përgjigje të shpejtë dhe të koordinuar nga institucionet.
Ai propozoi gjithashtu krijimin e një regjistri zyrtar të rasteve të dhunës mes nxënësve, duke garantuar mbrojtjen e identitetit të fëmijëve.
Nisma përfshin edhe ndryshime të mundshme ligjore për t’u dhënë shkollave më shumë kompetenca në trajtimin e rasteve, si dhe ofrimin e detyrueshëm të mbështetjes psikologjike për viktimat.
Ndër masat parandaluese përmenden kufizimi i përdorimit të telefonave celularë në shkolla, edukimi i vazhdueshëm i mësuesve, bashkëpunimi me prindërit dhe forcimi i ekipeve shkollore për identifikimin e hershëm të sjelljeve problematike.
Presidenti u bëri thirrje të gjitha institucioneve përgjegjëse që mbrojtja e fëmijëve nga dhuna të trajtohet si një nga prioritetet kryesore të shtetit, duke nënvizuar se çdo fëmijë ka të drejtë të ndjekë shkollën pa frikë.
