Vendet e NATO-s u zotuan të blejnë qindra miliona euro më shumë armë amerikane për Ukrainën, ndërsa Presidentit rus, Vladimir Putin, iu kërkua të ndalonte me “mburrjet” e tij dhe të merrej seriozisht me bisedimet e paqes.
Ministrat e jashtëm të NATO-s u mblodhën në Bruksel në takimin e parë që nga publikimi i një draft-plani paqeje për t’i dhënë fund luftës në Ukrainë, ndërsa aleanca shprehu shqetësime në rritje për përjashtimin e saj nga bisedimet, të cilat kryesisht janë udhëhequr nga zyrtarë amerikanë dhe rusë.
Në hapje të takimit, shefi i NATO-s, Mark Rutte, tha se Rusia po vazhdon të testojë aftësitë e aleancës dhe se ata po përballen me rreziqe reale dhe afatgjata: “Rusia ka shkelur hapësirën tonë ajrore me avionë dhe dronë, ka kryer akte sabotazhi dhe ka dërguar anije spiune në ujërat tona. Të gjitha këto veprime janë të rrezikshme. Ajo po punon ngushtë me Kinën, Korenë e Veriut dhe Iranin për të goditur shoqëritë tona dhe për të shkatërruar rendin global. Ata po përgatiten për një konfrontim afatgjatë, dhe ne po përgjigjemi me forcë, unitet dhe vendosmëri.”
Sipas Rutes, vendet e NATO-s po rrisin investimet në mbrojtje, ndërsa Ukraina ka më shumë nevojë për mbështetje se kurrë më parë, veçanërisht me dimrin që po vjen dhe me sulmet ruse që vazhdojnë.
“Bisedimet e paqes janë duke vazhduar, kjo është mirë, por në të njëjtën kohë, ne duhet të sigurohemi që ndërsa ato zhvillohen, Ukraina të jetë në pozicionin më të fortë të mundshëm për të vazhduar luftën,” tha Rutte.
Si pjesë e këtyre lëvizjeve, Gjermania, Polonia, Norvegjia, Holanda dhe Kanadaja thanë se do të angazhohen së bashku për rreth 1 miliard dollarë më shumë për një skemë për të blerë armë amerikane për Ukrainën.
Para takimit, Rutte këmbënguli se çdo element i një plani të përditësuar të paqes që përfshin NATO-n do të duhet të ketë kontributin e aleancës.
Ai shtoi se, ndërsa aktualisht nuk ka konsensus midis anëtarëve të NATO-s për anëtarësimin e Ukrainës në aleancë, politika e dyerve të hapura e NATO-s ende qëndron.
Ka shqetësim të thellë brenda NATO-s se administrata e ish-presidentit Trump po vepron më shumë si arbitër mes Evropës dhe Rusisë, dhe jo si një anëtar i vetë aleancës. S
ekretari amerikan i Shtetit, Marco Rubio, nuk mori pjesë në takim.
