Qendra Shëndetësore e Kryeqytetit njoftoi se në bashkëpunim me Ministrinë e Shëndetësisë dhe institucione të tjera shëndetësore, me rastin e fushatës kombëtare “Tetori Rozë”, po nisin aktivitete për ndërgjegjësimin për parandalimin dhe zbulimin e hershëm të kancerit të gjirit.
Ata thanë se fushata synon të informojë publikun për rëndësinë e zbulimit të hershëm të sëmundjes, sepse diagnostikimi në kohë dhe trajtimi adekuat mund të rrisin ndjeshëm shanset për shërim.
Ata ftojnë të gjitha gratë që të përfitojnë nga mundësia për ekzaminime parandaluese dhe mamografike, pasi siç theksuan, çdo grua është përgjegjëse për shëndetin e saj.
Në Qendrën Shëndetësore të Kryeqytetit do të kryhen ekzaminime parandaluese për gratë mbi moshën 40 vjeçare, ku shërbimin e mamografisë do ta kenë gratë nga Plevla, Zhablaku, Kollashini, Mojkovci, Cetina, Zeta, Tuzi dhe Podgorica.
Gjithashtu, gratë e moshës 50-69 vjeç nga Podgorica, Danillovgradi, Cetina dhe Kollashini do të referohen për mamografi digjitale në Qendrën Klinike përmes programit të skriningut.
“Së bashku mund të kontribuojmë për shëndetin më të mirë të grave në mjedisin tonë dhe të përmbushim qëllimin e ndërgjegjësimit për parandalimin dhe zbulimin e hershëm të kancerit të gjirit. Është e rëndësishme që çdo grua të ndihet e mbështetur dhe e informuar, dhe se ajo e di se sa e rëndësishme është që të ketë ekzaminime të rregullta. Komuniteti ynë mund të bëhet më i shëndetshëm nëse punojmë së bashku për këto çështje. Duke ndërgjegjësuar kontribuojmë për shëndetin më të mirë të të gjitha grave në komunitetin tonë”, njoftojnë nga Qendra Shëndetësore e Kryeqytetit.
