Dashamirësit e ëmbëlsirave me siguri e kanë pikë të dobët atë që njihet si Crème Brûlée ose Krem Qumështi i Djegur.
Kjo ëmbëlsirë u shfaq për herë të parë, në librin e gatimit të François Massialot të publikuar në vitin 1691.
Krem Brule shërbehet në forma rrumbullake dhe mbushet me sheqer të karamelizuar.
Sipërfaqja e ëmbëlsirës është e kristaltë ndërsa kremi është i freskët dhe i lehtë.
Kjo ëmbëlsirë delikate bëhet akoma më e shijshme kur në sipërfaqe vendosen copa portokalli ose luleshtrydhe.
Receta e Lehtë e Krem Brule
Përbërësit
(Për 5 racione)
- 6 të verdha vezësh
- 6 lugë gjelle me sheqer të bardhë
- Gjysëm luge çaji me vanilje pudër
- 2 filxhanë e gjysëm me krem qumështi ose pana
- 2 lugë gjelle me sheqer kaf (e gjeni në supermarkete)
Përgatitja
Ndizeni furrën në 150 gradë.
Në një tas qelqi përzieni të verdhat e vezëve, katër lugë gjelle me sheqer dhe vaniljen pluhur.
Rrihini mirë së bashku deri sa të formohet një masë kremoze dhe e trashë.
Më pas kremin e qumështit hidheni në një tenxhere dhe vendoseni në zjarr.
Përziejeni rregullisht deri në pikën që nis të marrë një valë.
Hiqeni menjëherë nga zjarri dhe shtojeni në tasin e qelqit kur keni lënë të verdhat e vezëve.
Përziejini së bashku rregullisht deri sa të treten në një.
Merrni një tenxhere me ujë të nxehtë dhe vendoseni në zjarr.
Brenda saj, vendosni një tenxhere tjetër më të vogël ku të hidhni masën e përzier më lart.
Gatuajeni me avull për rreth tre minuta dhe më pas hidheni nëpër format katrore ose rrumbullake të pjekjes.
Futini në furrë dhe piqini për 30 minuta.
Më pas hiqini nga furra dhe lërini të ftohen në temperaturë ambienti.
Mbajini në frigorifer për të paktën 1 orë ose gjatë gjithë natës.
Në një tas tjetër përzieni dy lugë gjelle me sheqer të bardhë dhe kaf.
Spërkateni pluhurin e sheqerit mbi sipërfaqen e ftohur të ëmbëlsirës.
Për karamelizim mund të përdorni pajisjen specifike me zjarr, ose t’i fusni ëmbëlsirat për 2 minuta në furrë duke mbajtur ndezur vetëm pjesën e sipërme të sobës.
Më pas lëreni të ftohet ose futeni në frigorifer.
