Shkarkimi i kryetares së Kuvendit, Danijela Gjuroviq, më 2 shtator do të ishte një mesazh i keq, pasi shumë institucione në vend tashmë nuk funksionojnë dhe janë në ud., vlerësoi kryeministri Dritan Abazoviq. “Do të ishte një mesazh i keq. Papërgjegjësia e politikanëve reflektohet në faktin se ata duan me çdo kusht me të gjitha mjetet t’i presin kokat e çdo institucioni. Nuk ka Gjykatë Kushtetuese, nuk ka Këshill Gjyqësor, shumë institucione po veprojnë në ud., u bë votëbesimi ndaj qeverisë. Nëse mendojnë se kjo është rruga, pas gjithë grabitjes për 30 vjet, pas gjithë krimit, shkëlqyeshëm. Vetëm mos u përdredhni në flamuj dhe mos bëni sikur jeni patriotë dhe europianë. Përpjekja për të prerë kokat e çdo institucioni, një përpjekje për të destabilizuar Malin e Zi, një përpjekje për ta shtyrë Malin e Zi në probleme në vend që të bëhet e kundërta është një shaka e papërgjegjshme e njerëzve që nuk duan që institucionet të funksionojnë në këtë vend vetëm sepse kanë frikë nga drejtësia“, tha Abazoviq. Kryeministri, duke iu përgjigjur pyetjeve të gazetarëve në Plevle, tha se nuk ka pasur negociata për formimin e qeverisë së re. “Kam biseduar joformalisht me disa kolegë. Seanca e caktuar për 2 shtator do të jetë një mundësi e mirë, nëse dikush ka iniciativë për bisedime, ne jemi këtu”, tha Abazoviq dhe shtoi se problemet në Mal të Zi mund të zgjidhen vetëm me dialog.
