Rritja e përshpejtuar ekonomike është ende i vetmi ilaç për rimëkëmbjen ekonomike, veçanërisht duke pasur parasysh ekzistimin e inflacionit, rritjen e normave referencë të interesit dhe paqëndrueshmërinë e tregjeve financiare ndërkombëtare, ndikimi i të cilave derdhet edhe në ekonomitë kombëtare, tha ministri i Financave, Aleksandër Damjanoviq.
“Mbështetja e plotë e autoriteteve monetare dhe kuptimi i pozicionit të sektorit real është i nevojshëm, për të mos ardhur në një situatë ku politika fiskale të jetë në varësi të politikës monetare ose, aq më keq, në funksion të interesave të sektorit financiar, gjë që ndodhte shpesh në situata krize”, tha Damjanoviq në Samitin e 10-të jubilar rajonal të Ministrave të Financave, Guvernatorëve dhe Drejtorëve të Administratave Tatimore të mbajtur në Beçiq.
Damjanoviq mori pjesë në panelin e Financave Publike të Shëndetshme – një parakusht kryesor për rritjen ekonomike dhe ndërtimin e një ekonomie moderne të tregut, edhe në kushtet e pasigurisë së zgjatur gjeopolitike.
“Në samitin, i cili edhe këtë vit mblodhi së bashku liderë në fushën e politikës fiskale dhe monetare të rajonit, si dhe përfaqësues të bankave dhe kompanive lidere, përmes një dialogu interaktiv u vlerësua ndikimi i tendencave globale në financat publike të rajonit, vazhdimi i reformave strukturore, lufta kundër ekonomisë gri, si dhe rëndësia e bashkëpunimit të ndërsjellë ndërmjet shteteve dhe bashkëpunimit me organizatat financiare ndërkombëtare në kohë krize”, njofton Ministria.
