Foto: Ministria e Punëve të Brendshme / MUP
Qytetarët e Malit të Zi që kanë pësuar dëme nga zjarret duhet t’i raportojnë ato pranë komisioneve lokale për vlerësimin e dëmeve, humbjeve dhe nevojave brenda 15 ditësh nga momenti i shkaktimit të dëmit.
Kështu deklaroi Luban Tmushiq, shef i Drejtorisë për Mbrojtje Civile dhe Reduktimin e Rrezikut nga Fatkeqësitë.
Ai shpjegoi se, pas marrjes së kërkesave, komisionet lokale kanë 60 ditë për të vlerësuar dëmet në terren dhe për t’ua dorëzuar raportin institucioneve kompetente.
Sipas tij, ndihma për qytetarët do të jepet nga pushteti lokal dhe shteti, në përputhje me ligjin dhe procedurat e përcaktuara.
Ai theksoi se ligji i ri për rimëkëmbjen pas fatkeqësive rregullon për herë të parë në mënyrë të plotë procedurat për vlerësimin e dëmeve dhe dhënien e ndihmës.
Tmushiq u bëri thirrje qytetarëve që kanë pësuar dëme nga zjarret t’i raportojnë ato sa më shpejt përmes formularëve të përcaktuar.
Ai paralajmëroi gjithashtu se mund të ketë raste kur fondet në dispozicion nuk janë të mjaftueshme për të mbuluar të gjitha kërkesat.
Sipas ligjit, komunat duhet të planifikojnë 2 për qind të të hyrave vjetore të buxhetit për ndihmën ndaj qytetarëve të prekur nga fatkeqësitë, ndërsa fondet për këtë qëllim duhet të parashikohen edhe nga shteti. Masat vlejnë edhe për subjektet ekonomike.
