Raportimet nga Argjentina thonë se vetëm Roma e ka ofertën zyrtare në tavolinë për Paulo Dybalan, duke qenë se Interi dhe Milani nuk e konsiderojnë si prioritet.
‘La Joya’ është lojtar i lirë që nga 30 qershori kur i skadoi kontrata me Juventusin dhe Zonja e Vjetër nuk ia vazhdoi atë.
Ai ka qenë pranë kalimit te Interi, mirëpo rikthimi i Romelu Lukakut nga Chelsea në formë huazimi, e ka lënë prapa në zgjedhjet e trajnerit Simone Inzaghi.
(Foto: Instagram/paulodybala)
Milani vazhdon të jetë i interesuar, mirëpo TyC Sport njofton se oferta e vetme zyrtare që u ka shkuar agjentëve të argjentinasit është nga Roma.Lexo po ashtu:Napoli dhe Roma në luftë për Paulo Dybalan
Te Giallorossët, ai do paguhej gjashtë milionë euro në sezon – shifër që e kishte kërkuar edhe te Interi (kujtojmë që Dybala donte mbi 10 milionë euro në sezon për të qëndruar te Juve).
(Foto: Instagram/paulodybala)
Roma nuk është në Ligën e Kampionëve dhe nuk konsiderohet konkurrent për titull, por me Jose Mourinhon ambiciet gjithmonë ekzistojnë, pasi që në sezonin e parë fitoi Ligën e Konferencës.
Në rast të transferimit të 28-vjeçarit në Stadio Olimpico, do t’i mundësonte Nicolo Zaniolo të largohej drejt Juventusit.
Në anën tjetër, Arsenali, Manchester Unitedi dhe Napoli, po e monitorojnë situatën. /Telegrafi/
