Papa Françesku mbylli turin e tij një-javor në Afrikë. Mesha e tij përfundimtare ishte në Sudanin e Jugut, ku bëri thirrje që njerëzit të dorëzonin “armët e urrejtjes”. Turma të mëdha adhuruesish ishin mbledhur në kryeqytetin Juba për të parë papën 86-vjeçar, i cili e bëri paqen dhe pajtimin temën e udhëtimit të tij tre-ditor në kombin më të ri në botë. “Le të hedhim armët e urrejtjes dhe hakmarrjes… Le të kapërcejmë mospëlqimet dhe neveritë që me kalimin e kohës janë bërë kronike dhe rrezikojnë të vendosin fiset dhe grupet etnike kundër njëri-tjetrit,” tha Françesku në predikimin e tij. Kjo ishte vizita e parë papale në vendin me shumicë të krishterë, i cili arriti pavarësinë nga Sudani me shumicë myslimane në vitin 2011 pas një lufte të gjatë dhe të përgjakshme civile.
