Foto: kallxo.com
Sipas të dhënave të Komisionit Evropian, Mali i Zi ka arritur rezultatin më të mirë në mesin e vendeve të Ballkanit Perëndimor në zbatimin e reformave të parashikuara nga Agjenda e Reformave në kuadër të Planit të Rritjes të Bashkimit Evropian.
Mali i Zi ka përmbushur 32 nga 57 masat reformuese, ose 56%, duke u renditur i pari në rajon. Pas tij vjen Shqipëria me 50% të reformave të realizuara, ndërsa Maqedonia e Veriut ka arritur 44%.
Nga ana tjetër, Serbia ka realizuar vetëm 8% të reformave, ndërsa Bosnja dhe Hercegovina dhe Kosova nuk kanë përmbushur asnjë nga masat e parashikuara.
Komisioni Evropian ka vlerësuar gjithashtu se Mali i Zi i plotëson kushtet për këstin e tretë të fondeve nga Instrumenti për Reforma dhe Rritje për Ballkanin Perëndimor.
Në raport theksohet se institucionet demokratike në Mal të Zi funksionojnë përgjithësisht mirë dhe se është arritur progres në procesin e integrimit evropian.
Megjithatë, vendi vazhdon të përballet me polarizim politik, skenë parlamentare të fragmentuar dhe nevojë për forcimin e institucioneve.
Komisioni vëren përparim edhe në fushën e mediave dhe lirisë së shprehjes, por kërkon zbatim më të plotë të ligjeve të reja mediatike.
Në drejtësi dhe luftën kundër korrupsionit, nevojiten përpjekje të mëtejshme për zbatimin e ligjeve dhe rritjen e efikasitetit. Sa i përket ekonomisë, ekonomia malazeze ka shënuar rritje prej rreth 3% gjatë vitit 2025, me inflacion 3.8%, ndërsa deficiti buxhetor dhe borxhi publik janë rritur.
Pavarësisht këtyre sfidave, Komisioni vlerëson se politikat ekonomike mbeten të orientuara drejt stabilitetit.
Në fund, Komisioni Evropian konstaton se Mali i Zi ka bërë progresin më të madh në rajon në zbatimin e reformave dhe i plotëson kushtet për vazhdimin e përfitimit të fondeve nga Plani i Rritjes i BE-së.
