Foto: CDM
Pas ndeshjes mes klubit të futbollit Deçiq dhe Buduqnost, mbrëmjen e së mërkurës konkretisht më datën 2 prill në Tuz ka ndodhur një incident i rëndë, ku lokali “Tasty” ka pësuar dëme të renda nga tifozët „Barbarët – Varvari“.
Tifozët e klubit Buduqnost kanë ndezur flakadanë dhe kanë hedhur gurë dhe mjete të tjera në lokal, duke shkaktuar zjarrë dhe duke i traumatizuar klijentët e shumtë të cilin në ato momente ishin brenda në lokal. Kjo mund të vërehet edhe nëpërmjet videove që janë xhiruar nga të pranishmit në vendngjarje.
Në lidhje me këtë reagoi nënkryetari i Kuvendit të Malit të Zi, Nikollë Camaj, i cili në fjalën e tij procedurale në Këshillin Administrativ, dënoi ashpër vandalizmin i cili ndodhi mbrëmë në Tuz, i shkaktuar nga grupi i tifozëve të KF „Buduqnost“ – „Barbarët“.
„Pas një ndeshjeje të bukur dhe të suksesshme, një grup huliganësh, të cilët u ndanë nga tifozët e tjerë, shkaktuan dëme duke shkatërruar inventarin e një lokali. Në të njëjtën kohë, ata hodhën flakadanë brenda lokalit, një akt të tillë i cili duhet të dënohet me forcë dhe të merr masa të menjëhershme nga autoritetet përkatëse. Po ashtu, duhen të merren masa ndaj klubit sportiv, i cili duhet t’i bindë tifozët e tij se një sjellje e tillë është e papranueshme. Sjellja e tillë jo vetëm që dëmton sportin, por gjithashtu minon marrëdhëniet mes individëve dhe shoqërisë,“ thotë Camaj.
Nënkryetari Camaj më tej shtoi se e rëndësishme të theksohet është se, sipas dëshmive të personave të pranishëm dhe sipas asaj që u raportua në media, policët të cilët ishin të angazhuar në ruajtjen e rendit dukeshin se ishin të ndikuar nga alkooli. Kjo është një arsye shtesë për të kërkuar një dënim të drejtë dhe masat përkatëse.
„Prandaj, pres që Ministria e Punëve të Brendshme të ndërmarrë hapa për të identifikuar personat përgjegjës dhe për të marrë masa ndaj policëve që nuk e kanë kryer si duhet detyrën e tyre,“ tha Camaj.
Ai theksoi se shteti duhet të ndërmarr[ masat e duhura që sporti të mbetet sport dhe asgjë tjetër.
Po ashtu, ministri i Administratës Publike Marash Dukaj reagoi në lidhje me situatën e mbrëmshme ku ndër të tjera tha: „Evropa e zgjidhi problemin e huliganizmit katër dekada më parë, pas tragjedisë në stadiumin Heysel në vitin 1985, kur 39 persona humbën jetën në përplasjet e tifozëve. Megjithatë, në Mal të Zi vazhdojmë të jemi dëshmitarë të mungesës së një reagimi serioz nga organet kompetente. Bëjmë pyetjen: çfarë duhet të ndodhë tjetër që institucionet më në fund të marrin përgjegjësi dhe të marrin masa konkrete? Skena të tilla nuk duhet të përsëriten – as në Tuz, e askund në Mal të Zi. Është koha për veprim vendimtar dhe mbrojtje të qytetarëve!“
