Bashkimi Evropian është në dialog me Qeverinë e Kosovës lidhur me ndryshimet e miratuara në Ligjin për Dhomat e Specializuara të Kosovës, të njohura si Gjykata Speciale, ka deklaruar komisionerja për Zgjerim e BE-së, Marta Kos.
Ajo paralajmëroi se ndryshimet e propozuara mund të rrezikojnë përparimin e arritur nga Kosova, ndërsa konfirmoi se Brukseli tashmë është duke diskutuar këtë çështje me institucionet kosovare.
Ndryshimet në ligj u iniciuan nga Partia Demokratike e Kosovës (PDK) dhe u miratuan më 6 tetor në Kuvend. Megjithatë, më 22 tetor, presidentja e Kosovës, Justina Shiroka Pula, e ktheu ligjin në Kuvend për rishqyrtim, me kërkesë të vetë nismëtares së ndryshimeve.
BE-ja kishte shprehur shqetësime se ndryshimet mund të cenojnë pavarësinë dhe mandatin e Gjykatës Speciale në Hagë, duke kërkuar konsultime paraprake për çdo ndërhyrje ligjore që ndikon në funksionimin e saj.
Ndryshimet e miratuara parashikojnë kufizimin e juridiksionit të Gjykatës Speciale kryesisht në veprat që lidhen me pretendimet për trafikimin e organeve, shkurtimin e periudhës kohore që përfshin hetimet, transferimin e disa rasteve në Kosovë dhe kufizimin e dënimeve maksimale në 15 vjet burgim.
Po ashtu, parashihet mundësia e faljes presidenciale për personat e dënuar. Sipas zotimeve të marra nga Kosova në vitin 2014, përmes letërkëmbimit ndërmjet ish-presidentes Atifete Jahjaga dhe ish-përfaqësueses së lartë të BE-së, Catherine Ashton, institucionet e Kosovës duhet të konsultohen me
Bashkimin Evropian për çdo ndryshim ligjor që mund të ndikojë në mandatin e Gjykatës Speciale.
Ndërkohë, nga Dhomat e Specializuara në Hagë është bërë e ditur më herët se nuk janë konsultuar për këtë nismë ligjore.
Deri më tani, Qeveria e Kosovës nuk ka dhënë përgjigje lidhur me dialogun e përmendur nga komisionerja Marta Kos dhe shqetësimet konkrete të Brukselit.
