Sekretari amerikan i Shtetit, Marco Rubio, paralajmëroi se lufta mes Rusisë dhe Ukrainës rrezikon të përhapet edhe në vendet fqinje, ndërsa theksoi se Shtetet e Bashkuara do të vazhdojnë përpjekjet diplomatike për arritjen e një marrëveshjeje paqeje.
Gjatë një takimi me zyrtarë të pesë vendeve të Azisë Qendrore në Samarkand të Uzbekistanit, më 19 tetor, Rubio deklaroi se konflikti nuk po sjell fitore për asnjërën palë, ndërsa çdo ditë shkakton viktima dhe shkatërrime.
Ai mbrojti përpjekjet e presidentit Donald Trump për të nxitur negociatat mes Moskës dhe Kievit, duke pranuar se deri tani përparimi ka qenë i kufizuar.
Sipas Rubios, incidentet me dronë, operacionet e dështuara të sabotazhit dhe ndërhyrjet elektronike mund të shkaktojnë dëme edhe në shtetet fqinje, veçanërisht në Evropën Lindore, duke rritur rrezikun e një konflikti më të gjerë.
Ai theksoi se arritja e paqes do të varet nga gatishmëria e të dyja palëve për të bërë lëshime, ndërsa mbrojti edhe vendimin e administratës amerikane për pezullimin e përkohshëm të disa sanksioneve për 60 ditë, me synimin për t’i dhënë hapësirë negociatave.
