Foto: Kuvendi i Malit të Zi / Skupština Crne Gore
Deputetët e Kuvendit të Malit të Zi kanë vazhduar debatin për ndryshimet kushtetuese që parashohin kontrollin e integritetit të kandidatëve për mandatar dhe anëtarë të Qeverisë, me synimin për të forcuar transparencën dhe për të parandaluar konfliktin e interesit dhe korrupsionin.
Zëvendëskryeministri për Drejtësi, Luftë kundër Korrupsionit dhe Sistemin Politik, Momo Koprivica, tha se ndryshimet përbëjnë një hap të rëndësishëm drejt forcimit të institucioneve dhe se Qeveria është e gatshme të arrijë konsensus me opozitën.
Ai shprehu gatishmërinë që mekanizmat e kontrollit të përcaktohen më hollësisht me një ligj të veçantë, të miratuar me shumicë prej dy të tretash të deputetëve.
Nga ana tjetër, Partia Demokratike e Socialistëve (PDS) dhe përfaqësues të tjerë të opozitës shprehën rezerva, duke kërkuar që kontrolli të përfshijë edhe kandidatët për deputetë dhe funksionarë të tjerë të lartë.
Ata paralajmëruan se ndryshimet e propozuara mund të cenojnë vullnetin zgjedhor të qytetarëve nëse mekanizmat nuk përcaktohen qartë. Projektndryshimet parashohin që personat që nuk i plotësojnë kushtet e integritetit të përcaktuara me ligj të mos mund të propozohen për mandatar ose ministër.
Debati zhvillohet në kuadër të përpjekjeve të Malit të Zi për të përparuar në negociatat e anëtarësimit në Bashkimin Evropian.
