Bashkimi Evropian po avancon me procesin e zgjerimit, ndërsa këtë javë pritet të mbahen katër konferenca ndërqeveritare me Malin e Zi, Shqipërinë, Moldavinë dhe Ukrainën.
Komisionerja evropiane për Zgjerimin, Marta Kos, e cilësoi këtë një dëshmi të qartë se procesi i anëtarësimit është në lëvizje dhe se vendet kandidate po shënojnë përparim.
Konferenca ndërqeveritare me Shqipërinë do të mbahet më 13 tetor në Luksemburg, ku pritet të mbyllet kapitulli 20 i negociatave, që lidhet me sipërmarrjen dhe politikat industriale.
Kos theksoi se përafrimi strategjik me Bashkimin Evropian është kusht thelbësor për anëtarësimin, duke përfshirë harmonizimin me politikën e jashtme dhe të sigurisë, sanksionet, politikat energjetike dhe infrastrukturën.
Sipas saj, anëtarët e rinj duhet ta forcojnë Bashkimin Evropian dhe jo ta dobësojnë atë.
