Kryeministri i Kosovës, Albin Kurti, ka ritheksuar rëndësinë e partneritetit strategjik me Shtetet e Bashkuara të Amerikës dhe bashkëpunimit të ngushtë me NATO-n, duke i cilësuar ato si prioritete afatgjata të politikës së jashtme të Kosovës.
Ai i bëri këto deklarata gjatë hapjes së edicionit të 12-të të Shkollës Diplomatike për diplomatët e rinj, të organizuar nga Ministria e Punëve të Jashtme dhe Diasporës përmes Akademisë Diplomatike të Kosovës.
Kurti vlerësoi se ky program, i cili organizohet prej më shumë se një dekade, krijon mundësi për shkëmbimin e ideve, ndërtimin e lidhjeve ndërkombëtare dhe forcimin e bashkëpunimit mes diplomatëve të rinj nga vende të ndryshme të botës.
Ai theksoi se përvoja e Kosovës në çështjet e paqes, sigurisë, sovranitetit, sundimit të ligjit dhe të drejtave të njeriut e bën vendin një hapësirë të rëndësishme për diskutimin e sfidave ndërkombëtare.
Duke folur për synimet e Kosovës në politikën e jashtme, Kurti përmendi procesin e integrimit evropian, liberalizimin e vizave dhe përpjekjet për anëtarësim në Këshillin e Evropës dhe INTERPOL.
Sipas tij, anëtarësimi në Këshillin e Evropës do t’u mundësonte qytetarëve të Kosovës qasje në Gjykatën Evropiane për të Drejtat e Njeriut, ndërsa anëtarësimi në INTERPOL do të forconte bashkëpunimin e institucioneve të sigurisë me policitë e vendeve të tjera.
Kurti foli edhe për kontributin e Kosovës në sigurinë ndërkombëtare, duke përmendur trajnimin e personelit ushtarak ukrainas dhe pjesëmarrjen në ushtrime të përbashkëta ushtarake me partnerët ndërkombëtarë.
Ai paralajmëroi se Ballkani Perëndimor mbetet i ekspozuar ndaj presioneve të jashtme, dezinformimit dhe përpjekjeve për të minuar institucionet demokratike, të cilat mund të rrezikojnë paqen dhe stabilitetin rajonal.
Në këtë kontekst, kryeministri theksoi se Kosova do të vazhdojë të investojë në forcimin e institucioneve demokratike dhe në thellimin e bashkëpunimit me aleatët ndërkombëtarë, duke nënvizuar se partneriteti strategjik me SHBA-në dhe bashkëpunimi me NATO-n mbeten shtylla kryesore të orientimit të saj në politikën e jashtme.
