Ukraina vazhdon të mos e njohë pavarësinë e Kosovës, ndërsa në Kiev janë të pranishme disa argumente që ndikojnë në qëndrimin zyrtar të vendit. Megjithatë, vendimi përfundimtar për ndryshimin e kësaj politike i takon presidentit ukrainas, Volodymyr Zelensky.
Kështu deklaroi për Radio Evropa e Lirë kryetari i Komisionit për Politikë të Jashtme dhe Bashkëpunim Ndërparlamentar në Parlamentin ukrainas, Oleksandr Merezhko.
Sipas tij, një nga argumentet kryesore kundër njohjes lidhet me frikën se Rusia mund ta përdorë njohjen e Kosovës si precedent për të justifikuar pushtimin e territoreve ukrainase, përfshirë Krimenë dhe pjesë të tjera të vendit.
Argumenti i dytë lidhet me qëndrimin e Serbisë ndaj Ukrainës.
Beogradi mbështet integritetin territorial të Ukrainës dhe, sipas Merezhkos, kjo krijon një argument që edhe Kievi të respektojë integritetin territorial të Serbisë.
Një tjetër faktor është bashkëpunimi ushtarak i Serbisë me vendet e tjera. Merezhko theksoi se municionet e prodhuara ose të shitura nga Serbia përfundojnë edhe në Ukrainë, ku përdoren në luftën kundër forcave ruse.
Megjithatë, deputeti ukrainas tha se këto argumente mund të rishikohen dhe se çështja e Kosovës mund të rikthehet në agjendën politike të Kievit pas përfundimit të luftës.
Ai shtoi se personalisht është skeptik ndaj argumenteve kundër njohjes.
Qëndrimi i Ukrainës ndaj Kosovës u rikthye në vëmendje gjatë vizitës së parë zyrtare të Zelenskyt në Beograd.
Presidenti ukrainas deklaroi se Kievi nuk e ka ndryshuar politikën e tij ndaj Kosovës dhe se respekton integritetin territorial të Serbisë dhe të drejtën ndërkombëtare.
Deklarata shkaktoi reagime në Prishtinë dhe në Ukrainë. Deputeti ukrainas Oleksiy Goncharenko e kritikoi Zelenskyn, duke e cilësuar qëndrimin e tij si gabim diplomatik dhe duke deklaruar se ai do të vazhdojë të angazhohet për njohjen e Kosovës.
Ukraina, e cila është përballur me pushtimin rus që nga viti 2014 dhe pushtimin në shkallë të gjerë që nga viti 2022, vazhdon ta lidhë çështjen e Kosovës me parimin e integritetit territorial të shteteve.
