Foto: EPA/Fabio Frustaci
Kryeministri i Kroacisë, Andrej Plenkoviq, ka deklaruar se nga autoritetet malazeze pret përparim në zgjidhjen e çështjeve të hapura që lidhen me respektimin e vlerave evropiane dhe marrëdhëniet e mira fqinjësore, në kuadër të kapitujve 23 dhe 31.
Këtë mesazh Plenkoviq e përcolli pas takimit trepalësh me presidentin e Këshillit Evropian, Antonio Costa, dhe presidenten e Komisionit Evropian, Ursula von der Leyen, në Dublin.
Ai bëri të ditur se në takim është diskutuar politika e zgjerimit të Bashkimit Evropian, me fokus të veçantë te Mali i Zi dhe synimi i tij për përfundimin e negociatave të anëtarësimit deri në fund të vitit 2026.
“Kroacia mbështet perspektivën evropiane të vendeve fqinje dhe vazhdimin e procesit të zgjerimit, bazuar në meritat individuale, zbatimin e reformave dhe përmbushjen e të gjitha kritereve për anëtarësim”, ka shkruar Plenkoviq në rrjetin social X.
Ai theksoi se Kroacia ka mbajtur një qëndrim konstruktiv gjatë gjithë procesit të negociatave të Malit të Zi dhe deri më tani ka mbështetur mbylljen e 23 kapitujve negociues.
Plenkoviq shtoi se në fokus të takimit joformal të Këshillit Evropian në Dublin do të jenë edhe buxheti shumëvjeçar i BE-së, mbështetja e mëtejshme për Ukrainën dhe inteligjenca artificiale.
