Kryeministri në detyrë i Kosovës, Albin Kurti, ka folur për mediat lidhur me procesin e formimit të qeverisë pas zgjedhjeve parlamentare.
I pyetur për mënyrën se si synon të tejkalojë ngërçin institucional të krijuar pas zgjedhjeve, Kurti deklaroi se çdo komunikim me partitë politike për mundësinë e formimit të një koalicioni qeverisës do të nisë vetëm pas certifikimit të rezultateve përfundimtare.
Ndërkohë, zëdhënësi i Komisionit Qendror të Zgjedhjeve, Valmir Elezi, bëri të ditur se shpallja e rezultateve përfundimtare varet nga përfundimi i të gjitha procedurave ankimore dhe nga vendimet e institucioneve kompetente.
Sipas rezultateve aktuale, Lëvizja Vetëvendosje ka siguruar 53 mandate në Kuvend, duke u renditur si forca e parë politike në vend. Partia Demokratike e Kosovës ka fituar 22 ulëse, Lidhja Demokratike e Kosovës 18 mandate, ndërsa Aleanca për Ardhmërinë e Kosovës 7 mandate.
Me këtë rezultat, Vetëvendosje ndodhet në një pozitë të favorshme për formimin e ekzekutivit të ri. Partia e Kurtit nuk ka nevojë për një koalicion me partitë kryesore shqiptare dhe mund të sigurojë shumicën parlamentare përmes mbështetjes së deputetëve nga komunitetet joshumicë, siç ka ndodhur edhe në mandatet e mëparshme.
Deklarata e Kurtit vjen në një moment kur në Kosovë po shtohen diskutimet për konfigurimin e qeverisë së ardhshme, ndërsa partitë opozitare kanë lënë të kuptohet se do të presin certifikimin e rezultateve përpara se të bëjnë publike qëndrimet e tyre lidhur me aleancat e mundshme.
Certifikimi i rezultateve pritet të jetë hapi i fundit që do t’i hapë rrugë konstituimit të Kuvendit dhe më pas procesit të formimit të institucioneve të reja të Kosovës.
