Foto: Qeveria e Malit të Zi / Vlada Crne Gore
Dita e Evropës në Mal të Zi ka filluar sot në Kollashin me një program institucional dhe kulturor, duke shënuar simbolikisht nisjen e muajit të dedikuar Evropës dhe vlerave evropiane në të gjithë vendin.
Në ceremoninë qendrore në Qendrën për Kulturë në Kollashin morën pjesë përfaqësues të institucioneve shtetërore, Delegacionit të BE-së në Mal të Zi, pushtetit lokal, institucioneve arsimore dhe qytetarë të shumtë.
Kryetari i Komunës së Kollashinit, Petko Bakiq, tha se Bashkimi Evropian nuk është vetëm projekt politik dhe ekonomik, por mbi të gjitha një bashkësi vlerash si solidariteti, respekti i ndërsjellë dhe mundësitë e barabarta. Ai theksoi se këto vlera reflektohen edhe në punën e komunës dhe jetën e përditshme të qytetarëve.
Kryenegociatori i Malit të Zi me BE-në, Predrag Zenoviq, u shpreh se Dita e Evropës kujton vlerat themelore mbi të cilat bazohet Bashkimi Evropian dhe njëkohësisht konfirmon rrugën evropiane të vendit, duke i parë këto vlera të pranishme në institucionet dhe komunitetet lokale.
Ministri i Administratës Publike, Marash Dukaj, theksoi rëndësinë e forcimit të kapaciteteve të vetëqeverisjes lokale, duke vënë në dukje se një pjesë e madhe e legjislacionit të BE-së zbatohet në nivel lokal, prandaj reformat në komuna janë thelbësore për integrimet evropiane.
Ambasadori i BE-së, Johan Sattler, konfirmoi mbështetjen e Bashkimit Evropian për Malin e Zi në procesin e integrimit, duke theksuar se ideja e bashkëpunimit dhe unitetit mes shteteve dhe njerëzve është themeli i Evropës moderne.
Dita e Evropës do të shënohet gjatë gjithë muajit maj në qytete të ndryshme të Malit të Zi me aktivitete të ndryshme kulturore dhe institucionale.
