Kryeministri i Kosovës, Albin Kurti deklaroi në Kuvend se vullneti i qytetarëve nuk mund të anulohet përmes dekreteve dhe se institucionet duhet të vazhdojnë funksionimin normal.
Ai kritikoi një dekret të presidentes, duke e cilësuar si në kundërshtim me Kushtetutën dhe që ka krijuar paqartësi institucionale, duke theksuar se nevojitet qartësi dhe përgjegjësi.
Kurti tha se shpërndarja e Kuvendit nuk është mjet për tejkalimin e krizave politike dhe se vendimi i Gjykatës Kushtetuese e ka sqaruar rolin e institucioneve.
Sipas tij, vendi nuk ndodhet në një boshllëk institucional, por përpara një detyre të qartë për të vazhduar punën në interes të qytetarëve.
Ai theksoi se prioritet duhet të jetë miratimi i marrëveshjeve ndërkombëtare dhe ligjeve që përmirësojnë jetën e qytetarëve, duke shtuar se proceset politike nuk duhet të bllokojnë zhvillimin e vendit.
Në luftën kundër korrupsionit, Kurti kërkoi që çdo keqpërdorim i fondeve publike të hetohet dhe të kthehet tek qytetarët, duke theksuar parimin e barazisë para ligjit.
Ai njoftoi gjithashtu se së shpejti në Kuvend do të dorëzohet projektligji për çmimet tavan, duke kërkuar mbështetje nga opozita për të mbrojtur qytetarët nga abuzimet me çmime të larta.
Duke folur për mediat dhe lirinë e shprehjes, Kurti tha se transparenca në financim dhe pronësi është e domosdoshme për të shmangur ndikimet e fshehta dhe dezinformimin.
Sipas tij, një qytetar i mirëinformuar është thelbësor për një demokraci funksionale.
Ai shtoi se projektligjet që do të dërgohen në Kuvend nuk synojnë kufizimin e mediave, por forcimin e pavarësisë së tyre, duke theksuar se liria e medias duhet të shoqërohet me përgjegjësi dhe transparencë për të mbrojtur interesin publik.
