Foto: Kuvendi i Malit të Zi / Skupština Crne Gore
Deputetët e Kuvendit të Malit të Zi kanë miratuar ndryshimet dhe plotësimet e Ligjit për legalizimin e objekteve pa leje, duke shtyrë afatin për dorëzimin e kërkesave për regjistrimin e këtyre objekteve në regjistrin e pasurive të paluajtshme për edhe gjashtë muaj.
Afati i mëparshëm skadonte më 14 shkurt.
Deputetët dhanë miratimin që, për shkak të urgjencës, këto ndryshime të hyjnë në fuqi menjëherë pas publikimit në Fletoren Zyrtare.
Ky ishte epilogu i seancës së sotme të Parlamentit, ku u diskutuan ndryshimet e këtij ligji.
Ministri i Planifikimit Hapësinor, Urbanizmit dhe Pronës Shtetërore, Sllaven Radunoviq, njoftoi se ndryshimet ishin kërkuar nga Unioni i Komunave dhe Drejtoria për Pasuri të Paluajtshme dhe Pronë Shtetërore, pasi disa masa të mëparshme rezultuan të pamundura për t’u zbatuar, për shkak të problemeve si legalizimi i objekteve bazuar në distancën nga kufiri i parcelës.
Ligji për legalizimin e objekteve pa leje hyri zyrtarisht në fuqi më 14 gusht të vitit të kaluar, dhe tani afati për dorëzimin e kërkesave për regjistrimin e objekteve të paligjshme në kadastrën shtetërore është zgjatur nga gjashtë në dymbëdhjetë muaj.
