Foto: predsjednik.me
Presidenti i Malit të Zi, Jakov Millatoviq, theksoi sot se lufta kundër gjuhës së urrejtjes nuk është thjesht një çështje fjalësh, por një betejë për njerëzit dhe dinjitetin e shoqërisë.
Ai paralajmëroi se fenomeni i gjuhës së urrejtjes po normalizohet gjithnjë e më shumë në Mal të Zi, veçanërisht në hapësirën digjitale, dhe nënvizoi nevojën për parandalim përmes edukimit qytetar, alfabetizimit mediatik dhe veprimit të përgjegjshëm të institucioneve, mediave dhe politikanëve.
Millatoviq theksoi se gjuhë e urrejtjes nuk është mendim apo kritikë, por një mesazh që dikush nuk është i mirëpritur, vlen më pak, duhet heshtur, përjashtuar, poshtëruar ose fshirë nga hapësira publike.
Ai paralajmëroi se kjo dukuri nuk është më një incident i izoluar, por po bëhet pjesë e përditshmërisë, veçanërisht në rrjetet sociale dhe komentet në portale, ku fillon të duket si diçka “normale” dhe e pranishme kudo.
Presidenti nënvizoi se Mali i Zi nuk mund ta pranojë këtë “normalitet të ri”. Për të krijuar një shoqëri të shëndetshme, ai theksoi se përgjigjja nuk mund të jetë vetëm reagim pas dëmit, por duhet të jetë parandalim, duke ndërtuar një kulturë që njeh kufirin mes lirisë së shprehjes dhe gjuhës që poshtëron, përjashton dhe nxit urrejtjen.
Në këtë kontekst, Millatoviq ritheksoi rëndësinë e edukimit qytetar, duke propozuar që ai të marrë status formal në sistemin arsimor.
Ai shpjegoi se edukimi qytetar ndihmon të rinjtë të dallojnë mospajtim nga urrejtja, të respektojnë diversitetin dhe të zgjidhin konfliktet përmes argumenteve e jo fyerjeve.
Gjithashtu, ai nënvizoi rëndësinë e alfabetizimit mediatik në mjedisin digjital modern. Një qytetar i arsimuar mediatikisht di të njohë manipulimin, dezinformimin dhe gjuhën që nxit urrejtje. Nëse të rinjtë nuk mësohen të “lexojnë” botën rreth tyre, dikush tjetër do t’ua interpretojë atë përmes stereotipeve, frikës dhe ndarjeve.
Millatoviq theksoi gjithashtu përgjegjësinë e tij personale si lider, duke vepruar si shembull i komunikimit publik, duke zgjedhur fjalët me kujdes dhe duke vepruar si president i të gjithë qytetarëve, duke bashkuar, jo ndarë.
Ai bëri një thirrje të qartë ndaj të gjitha aktorëve të shoqërisë: institucioneve që të veprojnë dhe të mos heshtin, mediave që të jenë të përgjegjshme në transmetimin e informacionit, politikanëve që të japin shembull dhe shkollave që të edukojnë gjeneratat e reja në të menduarit kritik, përmes edukimit qytetar dhe alfabetizimit mediatik.
Ai nënvizoi se gjithsecili duhet të ndihmojë në rikthimin e mirësjelljes në hapësirën publike.
Në fund, Presidenti Millatoviq theksoi se lufta kundër gjuhës së urrejtjes nuk është luftë kundër fjalëve, por luftë për njerëzit, për të drejtën e secilit të jetojë pa frikë, pa poshtërim dhe pa përjashtim.
