Foto: Biznis CG Portal
Në raportin global të Transparency International për vitin 2025, Mali i Zi shfaq performancë të qëndrueshme në luftën kundër korrupsionit, duke u dalluar pozitivisht në Ballkanin Perëndimor.
Raporti i Transparency International për vitin 2025 mbi Indeksin e Perceptimit të Korrupsionit përfshin edhe vlerësimet më të fundit për Shqipërinë dhe Kosovën, në kuadër të krahasimit global mes 182 vendeve dhe territoreve.
Në këtë indeks, Shqipëria është vlerësuar me 39 pikë dhe pozicionohet në vendin e 91-të në renditjen globale. Indeksi pasqyron perceptimin e nivelit të korrupsionit në sektorin publik dhe shërben si instrument krahasues ndërkombëtar mes shteteve.
Kosova, sipas të njëjtit raport, është vlerësuar me 43 pikë për vitin 2025 dhe renditet në vendin e 76-të. Mali i Zi është vlerësuar më mirë në Ballkanin Perëndimor sa i përket luftës kundër korrupsionit, ndërsa Serbia ka marrë numrin më të ulët të pikëve në rajon.
Transparency International thekson se në disa vende të Ballkanit Perëndimor, përgjigja e dobët e gjyqësorit shihet si një nga pengesat kryesore për një luftë të suksesshme kundër korrupsionit.
Gjithashtu, gjyqtarët dhe prokurorët po bëhen gjithnjë e më shumë objekt i sulmeve nga qeveritë. Organizata përmend Serbinë, ku pas hetimeve për abuzime të dyshuara nga anëtarë të qeverisë, Prokuroria për Krim të Organizuar “po përballet me presion në rritje, përfshirë fushata denigruese të udhëhequra nga qeveria, pengimin e bashkëpunimit me policinë dhe ndryshime ligjore që dobësojnë aftësinë e saj për të hetuar krimin e organizuar dhe korrupsionin e nivelit të lartë.”
Sipas raportit të publikuar, mesatarja globale e Indeksit të Perceptimit të Korrupsionit ka pësuar rënie gjatë më shumë se një dekade, duke arritur vetëm 42 nga 100 pikë. Renditja globale pasqyron pozicionin relativ të secilit vend në krahasim me vendet e tjera të përfshira në indeks.
Transparency International thekson se të dhënat për përpilimin e indeksit bazohen në vlerësime nga burime të pavarura dhe përfshijnë elemente si ryshfeti, keqpërdorimi i fondeve publike, emërimet politike në administratë, transparenca në deklarimin e pasurisë dhe konfliktit të interesit, si dhe mekanizmat për parandalimin dhe ndëshkimin e korrupsionit në sektorin publik.
