Foto: Qeveria e Malit të Zi / Vlada Crne Gore
Abu Dhabi Future Energy Company PJSC – Masdar, lider global në fushën e energjisë së pastër, dhe Elektroekonomia e Malit të Zi janë dakorduar të shqyrtojnë mundësinë e themelimit të një kompanie të përbashkët për realizimin e projekteve të mëdha të energjisë së ripërtëritshme në Mal të Zi.
Nënshkrimi i marrëveshjes kornizë u zhvillua gjatë Javës së Energjisë së Ripërtëritshme në Abu Dabi 2026, në prani të Sultan Al Jaber, ministër i Industrisë dhe Teknologjive të Avancuara të Emirateve të Bashkuara Arabe, president i COP28 dhe kryetar i Bordit të Masdar, kryeministrit të Malit të Zi, Millojko Spajiq, si dhe Admir Shahmanoviq, ministër i Energjisë dhe Minierave të Malit të Zi, si dhe përfaqësuesve të lartë të të dy kompanive.
Sipas njoftimit, në përputhje me kushtet e marrëveshjes, Masdar dhe EEMZ do të shqyrtojnë themelimin e një kompanie të përbashkët për zhvillimin, ndërtimin, pronësinë dhe menaxhimin e projekteve të energjisë së pastër përmes një sërë teknologjish, përfshirë energjinë diellore fotovoltaike, energjinë e erës, hidroenergjinë, sistemet e pavarura të ruajtjes së energjisë me bateri, si dhe zgjidhje hibride.
“Qëllimi i bashkëpunimit është të mbështesë nevojat energjetike të brendshme të Malit të Zi, duke mundësuar gjithashtu eksportin e energjisë elektrike të ripërtëritshme në Ballkan dhe Evropën Juglindore. Kjo përfshin përdorimin e interkonektorit ekzistues nëndetar të Malit të Zi me Italinë, si dhe mundësinë e zgjerimit të tij. Partneriteti synon të bashkojë pozicionin e EEMZ si prodhuesi kryesor i energjisë në Mal të Zi me përvojën globale të Masdar në zhvillimin e projekteve të energjisë së ripërtëritshme. Përmes këtij bashkëpunimi, Masdar dhe EEMZ përshpejtojnë sigurinë energjetike të Malit të Zi, si dhe kontribuojnë në transformimin energjetik të tregut më të gjerë evropian të energjisë”, thuhet në njoftim.
