Presidenti francez, Emmanuel Macron, njoftoi se mijëra vullnetarë të moshës 18 dhe 19 vjeç do të fillojnë shërbimin ushtarak vitin e ardhshëm, teksa zbuloi një program të ri që synon të forcojë forcat e armatosura të Francë, për t’iu përgjigjur shqetësimeve në rritje lidhur me kërcënimin e Rusia ndaj vendeve evropiane përtej luftës në Ukrainë.
Të rinjtë vullnetarë do të shërbejnë me uniformë për 10 muaj në territorin kontinental të Francës dhe në territoret e saj përtej detit, por jo në operacione ushtarake jashtë vendit, tha Macron në një fjalim në bazën ushtarake të Varces, e cila ndodhet në Alpet Franceze, raporton AP.
“Një shërbim i ri kombëtar do të vendoset gradualisht, duke filluar nga vera e ardhshme,” deklaroi Macron. “Në këtë botë të pasigurt, ku fuqia mbizotëron mbi ligjin dhe lufta është një realitet i përhershëm, kombi ynë nuk ka të drejtë të ketë frikë, panik, papërgatitje apo përçarje”.
Programi do të nisë me 3.000 të rinj që do të përzgjidhen verën e ardhshme dhe gradualisht do të rritet në 10.000 në vit deri në vitin 2030. Franca synon të arrijë deri në 50.000 vullnetarë në vit deri në vitin 2035, shifër kjo që do të përshtatet në varësi të kontekstit global, shtoi Macron.
Vullnetarët do të kenë status ushtarak dhe do të pajisen me paga dhe mjete. Pas një muaji trajnimi, ata do të caktohen për nëntë muaj në një njësi, ku do të kryejnë të njëjtat detyra si personeli aktiv ushtarak, shpjegoi ai.
Më pas, ata do të bashkohen me rezervën ushtarake dhe do të vazhdojnë shkollimin ose do të fillojnë punë. Ata që dëshirojnë do të mund të nisin edhe një karrierë profesionale në ushtrinë aktive, tha Macron.
Shërbimi i detyrueshëm ushtarak, të cilit Franca i dha fund në vitin 1996, nuk po merret në konsideratë.
Vetëm në “rrethana të jashtëzakonshme” Parlamenti mund të autorizojë thirrjen në shërbim të atyre personave, aftësitë e të cilëve janë identifikuar gjatë një kursi njëditor të mbrojtjes, në të cilin kalojnë të gjithë të rinjtë, dhe ta bëjë shërbimin kombëtar të detyrueshëm për ta, theksoi Macron.
Macron ka deklaruar më herët se Franca po kërkon të forcojë mbrojtjen e saj, pasi lufta e Rusisë në Ukrainë e ka vënë kontinentin evropian në “rrezik të madh”.
