Të paktën tre persona kanë humbur jetën në Xhamajkë, ndërsa zyrtarët po i bëjnë thirrje publikut të zhvendosen në zona më të larta dhe të strehohen para se uragani Melissa të godasë ishullin.
Stuhia e kategorisë pesë, që mund të jetë më e fuqishmja me të cilën Xhamajka është përballur ndonjëherë, po lëviz ngadalë nëpër Karaibe, duke shkaktuar tashmë tre viktima në Haiti dhe një në Republikën Dominikane.
Qendra Kombëtare Amerikane e Uraganeve raportoi se Melissa ishte 240 kilometra larg Kingstonit të hënën në mbrëmje, me shpejtësi maksimale të erës të parashikuar deri në 280 km/h.
Kryeministri i Xhamajkës, Andrew Holness, tha se pjesa perëndimore e ishullit do të përballet me tërbimin më të madh të stuhisë.
“Nuk besoj se ka ndonjë infrastrukturë në këtë rajon që mund t’i bëjë ballë një stuhie të kategorisë pesë, prandaj zhvendosjet janë të domosdoshme,” tha ai për CNN.
Gjatë një konference për shtyp, Holness shtoi se evakuimi po bëhet “për të shpëtuar jetë njerëzish” dhe paralajmëroi qytetarët: “Është në dorën tuaj të përdorni këtë informacion dhe të merrni vendimin e duhur.”
Një pjesë e rrezikut të uraganit buron nga ritmi i tij i ngadaltë: stuhia po lëviz më ngadalë se shumica e njerëzve, duke bërë që zonat e prekura të përballen me kushte të rënda për një kohë më të gjatë se në rastet e tjera të ngjashme.
Qendra Amerikane për Uragane paralajmëroi për përmbytje katastrofike, rrëshqitje të dheut, erëra të fuqishme që mund të ndërpresin linjat e energjisë dhe komunikimit, si dhe dëme të mëdha në infrastrukturë.
Parashikohet rreth një metër shi, ndërsa Xhamajka, Haiti, Republika Dominikane dhe Kuba mund të përballen me përmbytje dhe rrëshqitje të dheut. Uragani pritet të godasë së pari brigjet jugore të Xhamajkës, ku niveli i ujit mund të rritet deri në katër metra dhe të shkaktojë dallgë shkatërruese.
Pas kësaj, uragani Melissa do të vazhdojë drejt Kubës.
