Foto: Qeveria e Malit të Zi / Vlada Crne Gore
Kryeministri i Malit të Zi, Millojko Spajiq, njoftoi nga Londra se vendi i tij do të marrë presidencën e Procesit të Berlinit në vitin 2026, në një moment shumë të rëndësishëm për integrimin evropian të Ballkanit Perëndimor.
Spajiq theksoi se viti 2026 do të jetë vendimtar për Malin e Zi, pasi vendi planifikon të përfundojë të gjithë kapitujt e negociatave për anëtarësim në Bashkimin Evropian dhe të mbyllë procesin formal të integrimit.
Në të njëjtën kohë, Mali i Zi do të jetë nikoqir i Samitit BE–Ballkani Perëndimor dhe do të marrë presidencën e Komitetit të Ministrave të Këshillit të Evropës.
Kryeministri njoftoi se në udhëheqjen e Procesit të Berlinit, Mali i Zi do të fokusohet në përshpejtimin e implementimit të tregut të përbashkët rajonal, promovimin e agjendës së gjelbër, përmirësimin e transparencës dhe bashkëpunimin në fushat e digjitalizimit, sigurisë, arsimit, shkencës dhe inovacionit.
Spajiq nënvizoi rëndësinë e bashkëpunimit rajonal dhe evropian për të fuqizuar rezistencën ekonomike dhe strategjike të Ballkanit Perëndimor, duke përfshirë luftën kundër krimit të organizuar dhe korrupsionit, si dhe sigurimin e energjisë dhe ushqimit dhe ballafaqimin me ndryshimet klimatike.
Një lajm i rëndësishëm nga samiti ishte edhe mbështetja për krijimin e Qendrës Rajonale për Kapacitete Kibernetike në Mal të Zi, një iniciativë e përbashkët me Francën dhe Slloveninë, me mbështetjen e Britanisë së Madhe, për të forcuar sigurinë kibernetike në rajon.
Kryeministri Spajiq falënderoi Britaninë e Madhe për organizimin e shkëlqyer të samitit dhe theksoi se Procesi i Berlinit mbetet një platformë thelbësore për bashkëpunim rajonal, integrim ekonomik dhe të ardhmen evropiane.
Ai gjithashtu përmendi si një hap konkret dhe të rëndësishëm mundësinë e heqjes së tarifave të roamingut midis Ballkanit Perëndimor dhe BE-së, duke e quajtur këtë një sinjal të fortë të unitetit dhe përfshirjes digjitale.
Samiti i 12-të i Procesit të Berlinit u zhvillua në Londër, ku liderët ballkanikë dhe evropianë diskutuan për stabilitetin, sigurinë dhe bashkëpunimin ekonomik në rajon.
