Nuk ka paqe, stabilitet dhe përparim në rajon pa integrimin në Bashkimin Evropian. Mali i Zi ka një vizion të palëkundur për të luajtur rolin e një shembulli të mirë dhe të jetë nxitës i vlerave evropiane në rajon, me vendosmëri dhe përkushtim edhe më të madh për reforma, tha Presidenti i Malit të Zi, Millo Gjukanoviq në një takim me Ministrin kroat të Punëve të Jashtme dhe Evropiane Gordan Grliq Radman.
Gjukanoviq falënderoi përkushtimin e Kroacisë në perspektivën evropiane dhe përshëndeti rezultatet e mira të presidencës në kushte jashtëzakonisht të vështira të pandemisë, duke theksuar se angazhimi i Kroacisë për rajonin nuk ishte vetëm në frymën e fqinjësisë dhe miqësisë së dëshmuar, por edhe në interesin e BE.
Presidenti shprehu kënaqësi të plotë për marrëdhëniet midis dy vendeve, të cilat janë shembullore, pa probleme dhe me hapje të plotë dhe mirëkuptim në përgjigjen e të gjitha pyetjeve me interes të ndërsjellë.
Ai theksoi rëndësinë e Bashkimit Evropian, përmes planit të paralajmëruar ekonomik dhe investimeve, duke siguruar mbështetje që është me rëndësi kapitale për rikuperimin nga pasojat e rënda të pandemisë, dhe kontribuimin në afrimin infrastrukturor të rajonit dhe Evropës.
Të dy palët theksuan rëndësinë e komunitetit malazez në Kroaci për zhvillimin e marrëdhënieve miqësore të fqinjësisë së mirë, si dhe kontributin e ambasadave të të dy vendeve në këtë drejtim.
