Sipas pritshmërive, Mali i Zi do të jetë i pari nga vendet e Ballkanit Perëndimor që do t’i bashkohet Zonës së vetme të pagesave në euro (SEPA) më 1 janar të vitit të ardhshëm, njoftoi Drejtori i Përgjithshëm i Drejtorisë së Përgjithshme për Fqinjësinë dhe Negociatat e Zgjerimit (DG NEAR), Gert Jan Koopman.
“Pres që i pari nga vendet e Ballkanit Perëndimor t’i bashkohet SEPA-s më 1 janar të vitit të ardhshëm, përkatësisht Mali i Zi, ndërsa Shqipëria dhe Maqedonia e Veriut do të pasojnë së shpejti”, tha Koopman në një fjalim në seancën e përbashkët të Komisionit për Punë të Jashtme dhe Komisionit për Buxhetin e Parlamentit Evropian.
Ai, siç thuhet në profilin e Facebook-ut të Bankës Qendrore (BQMZ), ka bërë të ditur se edhe Serbia po tregon interesim të madh për të, si edhe Kosova dhe shpresojnë që edhe Bosnja e Hercegovina së shpejti të ndjekë atë rrugë.
Siç është paralajmëruar, ky hap përpara do të përmirësojë ndjeshëm ekonominë dhe mjedisin e biznesit të Malit të Zi, duke ofruar mundësi të reja për qytetarët dhe kompanitë.
Koopman tha se të gjitha vendet në rajonin e Ballkanit Perëndimor po përparojnë drejt anëtarësimit në SEPA dhe se në tetë muajt e fundit, tre prej tyre kanë përfunduar kryesisht detyrat e tyre.
