E diela ishte dita më e nxehtë e regjistruar ndonjëherë në nivel global, sipas të dhënave paraprake nga Shërbimi i Ndryshimeve Klimatike të Bashkimit Evropian, Copernicus.
Temperatura mesatare globale e ajrit në sipërfaqe të dielën arriti në 17.09 gradë Celsius, kjo është pak më e lartë se rekordi i mëparshëm i vendosur korrikun e kaluar prej 17.08 gradësh.
Valët e të nxehtit kanë përvëluar pjesë të mëdha të Shteteve të Bashkuara, Evropës dhe Rusisë gjatë javës së kaluar.
Copernicus konfirmoi se rekordi mesatar i temperaturës ditore i vendosur vitin e kaluar dukej se ishte thyer të dielën.
Viti i kaluar pa katër ditë radhazi që thyen rekordin, nga 3 korriku deri më 6 korrik, pasi ndryshimi i klimës, i nxitur nga djegia e lëndëve djegëse fosile, çoi nxehtësinë në ekstrem në të gjithë hemisferën veriore.
Çdo muaj që nga qershori 2023, është renditur tani si më i nxehti i planetit që nga fillimi i regjistrimeve, krahasuar me muajin korrespondues në vitet e mëparshme, tha Copernicus.
Disa shkencëtarë kanë sugjeruar se viti 2024 mund të kalojë 2023-ën si viti më i nxehtë që nga fillimi i regjistrimeve, pasi ndryshimet klimatike dhe fenomeni natyror i motit El Nino, i cili përfundoi në prill, i kanë shtyrë temperaturat gjithnjë e më lart këtë vit.
Spanja u përcëllua në valën e saj të parë zyrtare të të nxehtit, këtë vit, javën e kaluar, me temperatura që arritën në 40 gradë Celsius në një pjesë të madhe të vendit, ndërsa Italia, Greqia, Shqipëria dhe zona të tjera të Evropës Jugore regjistruan temperatura të padurueshme.
Autoritetet dhe ekspertët pajtohen se ndryshimi i klimës qëndron pas rritjes së temperaturave që po ushqen gjithashtu thatësirat e zgjatura dhe zjarret në Mesdhe dhe pjesë të tjera të botës.
