Hapja e pikës kufitare Çakorr dhe ndërtimi i rrugës Plavë – Deçan do të hapte hapësirë të konsiderueshme për zhvillimin e aktiviteteve ekonomike dhe bashkëpunim më të mirë mes qytetarëve në të dy anët e kufirit, është vlerësuar në takimin e kryetarit të Komunës së Plavës Nihad Canoviq, Ministrit të Administratës së Vetëqeverisjes Lokale të Republikës së Kosovës Elbert Krasniqi dhe Kryetarit të Komunës së Pejës Gazmend Muhaksheri. Sipas Canoviq, këto dy projekte janë të nevojshme për të arritur qëllimet e përbashkëta në të mirë të popullatës si të Malit të Zi ashtu edhe të Kosovës. “Vetëqeverisjet lokale do të krijojnë kushte për shfrytëzimin e të gjitha potencialeve të përbashkëta dhe në këtë mënyrë do të hapin mundësi të reja për bashkëpunim, shkëmbim të përvojave pozitive dhe përmirësim të marrëdhënieve të përgjithshme”, tha Canoviq. Siç thuhet në njoftimin e Komunës së Plavës, ministri Krasniqi është pajtuar me prioritetet e deklaruara dhe ka theksuar se nga pozita e tij do të avokojë për realizimin e këtyre dy projekteve jashtëzakonisht të rëndësishme. Bashkëbiseduesit u pajtuan se projektet IPA paraqesin gjithashtu një shans të mirë për bashkëpunimin e komunave kufitare, mbas takimit së bashku me drejtorin e Komunales, Ervin Toshiq, vizituan qendrën e riciklimit, e cila është ndërtuar në kuadër të një projekti të përbashkët të komunave Plavë dhe Gjakovë.
