Policia e Malit të Zi ka arrestuar kreun e dyshuar të një bande kriminale e cila ka përhapur frikë dhe gjakderdhje në Ballkan dhe në të gjithë Evropën, thanë zyrtarët të mërkurën. Arrestimi i Sllobodan Kashqelan ndodhi në qytetin bregdetar të Kotorrit. Zëvendëskryeministri, Dritan Abazoviq, e përshëndeti arrestimin e tij duke e paraqitur si suksesin më të madh të policisë në 10 vitet e fundit. Kashqelan, 58 vjeç, u arrestua nën dyshimet për organizim të grupit kriminal që ka kryer dhe po planifikonte akte të rënda kriminale, thanë mediat e Malit të Zi. Kashqelan supozohet se është udhëheqës i një klani kriminal, i cili që nga viti 2015 është përfshirë në një luftë të përgjakshme me një bandë rivale malazeze për kontrollin e kontrabandës së kokainës nga Amerika e Jugut. Dy bandat kishin filluar sulme vdekjeprurëse kundër njëra-tjetrës në Mal të Zi, Serbi dhe Bosnjë dhe Hercegovinë, si dhe në vendet evropiane Greqi, Spanjë dhe Itali. Kashqelan i ka mbijetuar dy përpjekjeve për vrasje, përfshirë atë të vitit 2016 kur ai u plagos rëndë në qytetin verior serb të Novi Sadit. Zëvëndëskryeministri, Abazoviq, tha se arrestimi i Kashqelan është vetëm fillimi i luftës së qeverisë kundër krimit. “Ne kemi premtuar se Mali i Zi nuk do të drejtohet nga mafia dhe ne jemi duke e përmbushur atë premtim”, tha ai.
