Foto: Risto Božović
Ambasadori i Bashkimit Evropian në Mal të Zi, Johann Sattler, ka deklaruar se Komisioni Evropian u rekomandon shteteve anëtare mbylljen e kapitujve 23 dhe 24 në negociatat e anëtarësimit të Malit të Zi, të cilët lidhen me sundimin e ligjit.
Gjatë ceremonisë së hapjes së Ditëve të Prokurorëve Shtetërorë të Malit të Zi, në Podgoricë, Sattler vlerësoi se përparimi i vendit në reformat evropiane gjatë viteve të fundit është i jashtëzakonshëm.
Ai theksoi se, pavarësisht vëmendjes së shtuar gjeopolitike ndaj zgjerimit të BE-së, procesi i anëtarësimit vazhdon të bazohet në merita dhe në rezultate konkrete.
Sipas Sattlerit, Mali i Zi ka dëshmuar se mund të arrijë rezultate në të gjithë kapitujt negociues, veçanërisht në fushën e sundimit të ligjit.
Ai shtoi se rekomandimi për mbylljen e kapitujve 23 dhe 24 është një hap i rëndësishëm drejt përfundimit të procesit negociues, duke theksuar se Bashkimi Evropian e mbështet përparimin e arritur nga institucionet malazeze.
Sattler nënvizoi se vendimi për të mbështetur arritjet e Malit të Zi përfshin edhe përgjegjësi për vetë institucionet evropiane, ndërsa shprehu mirënjohje për të gjithë ata që kanë kontribuar në reformat e vendit.
Ai deklaroi se fakti që Këshilli i BE-së ka nisur shqyrtimin e kapitujve që lidhen me sundimin e ligjit tregon se Mali i Zi po i afrohet fundit të një etape të rëndësishme në rrugën drejt anëtarësimit në Bashkimin Evropian.
