Në ditën e parë të vizitës së punës në SHBA, delegacioni i Ministrisë së Punëve të Brendshme/Administratës së Policisë, i përbërë nga ministri Filip Axhiq dhe drejtori i Drejtorisë së Policisë Zoran Brgjanin, së bashku me bashkëpunëtorët e tyre, u takua me përfaqësues të Byrosë Federal të Hetimit. Kjo me qëllim që të diskutohen modalitetet e mëtejshme të bashkëpunimit dhe mbështetjes së BFH-së për kolegët e Malit të Zi. Me këtë rast, siç është paralajmëruar, është organizuar një takim me ushtruesin e detyrës së kryeagjentit special, si dhe përfaqësues të ekipit të Oligarkëve dhe Departamentit për Krim të Organizuar. Përfaqësuesit e BFH-së shkëmbyen përvoja me kolegët e tyre malazezë në luftën kundër krimit të organizuar dhe diskutuan hetimet e vazhdueshme që ofrojnë një mundësi të shkëlqyer për zhvillimin e mëtejshëm të partneritetit. Axhiq vlerësoi bashkëpunimin që policia malazeze ka me BFH-së dhe falënderoi për mbështetjen që Ministria e Punëve të Brendshme/Administrata e Policisë malazeze merr si nga Byroja ashtu edhe nga agjencitë e tjera të zbatimit të ligjit amerikan. Brgjanin kujtoi bashkëpunimin e policisë malazeze me BFH-në, në kuadër të të cilit hetimet penale u kryen me sukses vitin e kaluar në lidhje me komunikimet nga pajisjet e koduara. Gjithashtu, drejtori i informoi bashkëbiseduesit për përmbajtjen e draft Strategjisë për luftën kundër krimit të organizuar transnacional, e cila pritet të miratohet në periudhën e ardhshme. Përfaqësuesit e të dyja palëve theksuan me këtë rast rëndësinë e shkëmbimit të përvojave, njohurive dhe praktikave më të mira dhe ritheksuan gatishmërinë e tyre për përmirësimin e bashkëpunimit në të gjitha segmentet me interes të përbashkët.
