Presidentja e Kosovës, Vjosa Osmani ka takuar në një mëngjes pune, ambasadorët e SHBA-së, Britanisë së Madhe, Gjermanisë, Francës, Italisë dhe të Bashkimit Evropian (BE), për të diskutuar situatën aktuale në veri të vendit pas sulmit terrorist dhe aktit të agresionit të Serbisë kundër Kosovës.
Siç njofton Zyra e Presidentes, në takim, presidentja Osmani ka falënderuar ambasadorët për solidaritetin dhe ngushëllimet e shprehura për vrasjen e heroit të Kosovës, rreshterit të Policisë së Kosovës, Afrim Bunjakut, si dhe lëndimit të disa policëve tjerë.
Osmani ka vlerësuar lartë punën e shkëlqyeshme dhe profesionale të Policisë së Kosovës dhe institucioneve të tjera të sigurisë në ballafaqimin me sulmin terrorist, derisa ka theksuar rëndësinë e bashkëpunimit të ngushtë me shtetet aleate dhe koordinimit të institucioneve të sigurisë, me qëllim të parandalimit të përsëritjes së akteve të tilla.
![](https://tvboin.com/wp-content/uploads/2023/09/thumbs_b_c_48b7d3cfe34949a41eb7863c495a4d81.jpg)
![](https://tvboin.com/wp-content/uploads/2023/09/thumbs_b_c_48b7d3cfe34949a41eb7863c495a4d81.jpg)
“Kosova është e vendosur që të vazhdojë ta promovojë paqen dhe stabilitetin në rajon si dhe të punojë me komunitetin lokal serb për t’i afruar dhe integruar në shoqërinë dhe institucionet e Kosovës”, ka theksuar Osmani.
Presidentja ka bërë të ditur se institucionet e Republikës së Kosovës janë të përkushtuara në menaxhimin e situatës aktuale dhe për të ndihmuar në arritjen e ruajtjen e paqes dhe stabilitetit.
Ajo tha se duhet të kërkohet llogaridhënie nga Serbia për veprimet e saj kundër Kosovës, duke ia bërë të qartë se duhet të ndalojë financimin, mbështetjen dhe shtytjen e grupeve kriminale për veprime terroriste.
“Mungesa e masave të tilla mund të keqpërdoret nga ana e Serbisë dhe për rrjedhojë mund të kemi përsëritje të veprimeve terroriste”, ka nënvizuar Osmani.