Kryetari i komunës së Tuzit, Nik Gjeloshaj dhe kryetari i Forcës së Re Demokratike, Nazif Cungu, kanë uruar kryeministrin e Shqipërisë Edi Ramen për fitoren e zgjedhjeve të mbajtura më 25 prill. “Jam shumë i lumtur për rezultatin tuaj historik të zgjedhjeve. Ky rezultat është provë e besimit të qytetarëve të Shqipërisë dhe shqiptarëve në suksesin e udhëheqjes Tuaj. Shfrytëzoni këtë sukses për rrugën evropiane të Shqipërisë dhe për të mirën e çdo shqiptari kudo është. I nderuari Kryeminister, Ju lutem që një gjë mos t’a harroni në asnjë moment, nuk jeni vetëm Kryeministri i qytetarëve të Shqipërisë, por i të gjithë shqiptarëve!,“ thekson Gjeloshaj. Ndërsa kryetari i Forcës Nazif Cungu në emër të partisë politike Forca e Re Demokratike dhe në emrin e tijpersonal, i uron fitoren e bindshme në zgjedhjet parlamentare të 25 prillit në Republikën e Shqipërisë. “Me shumë vëmendje e kemi përcjellur procesin zgjedhor dhe ju përgëzojmë për rezultatin e arritur përmes votës së popullit e cila ju dha besimin që të udhëheqni Republikën e Shqipërisë edhe në mandatin e ardhshëm katër vjeçar, të tretin me radhë. Populli shqiptarë në Mal të Zi pret nga ju një bashkëpunim edhe më të fuqishëm gjatë mandatit të ardhshëm, të jeni dorë e shtrirë në ndihmën e realizimit të çështjeve shqiptare në Mal të Zi, kurse ne do të jemi çdoherë urë lidhëse e avancimit të mëtejshëm të marrëdhënieve ndërshtetërore dhe promovimit të fqinjësisë së mirë në mes të Malit të Zi dhe Republikës së Shqipërisë,” përfundon mesazh urimi drejtuar kryeministrit shqiptar Edi Rama.
