Rritja e standardit të jetesës, lufta pa kompromis kundër krimit dhe korrupsionit, investimi në kapitalin njerëzor, mjedisin, janë disa nga prioritetet e aktivitetit tim politik, tha presidenti i Malit të Zi Jakov Millatoviq për Dan.
Millatoviq thotë se, pa reforma shtesë në administratë dhe arsim, si dhe pa politika zhvillimore kuptimplota të bazuara në dokumentacionin e organizuar planifikues dhe një mjedis të përmirësuar investues, zhvillimi afatgjatë i qëndrueshëm ekonomik, që sjell me vete rritje të pagave dhe pensioneve, është i diskutueshëm.
“Gjithçka tjetër përfaqëson marketingun politik dhe populizmin ekonomik, që mund të rezultojë në uljen e konkurrencës së ekonomisë sonë, së bashku me rritjen e borxhit publik, gjë që fatkeqësisht e shohim të ndodhë dhe që kërkon vëmendje shtesë”, thotë Millatoviq dhe thekson se fillimi i ciklit të investimeve në infrastrukturë është i nevojshëm.
“Zbatimi i projekteve të mëdha infrastrukturore duhet të ndjekë standardet më të mira evropiane, veçanërisht për sa i përket transparencës së procedurave të tenderit dhe mbrojtjes së mjedisit, si dhe për të garantuar zhvillim të qëndrueshëm dhe mbështetjen e fondeve të pakthyeshme të BE-së, së bashku me kreditë e lira nga institucionet financiare evropiane,” tha Millatoviq.
Ai tha se për sa i përket veprimtarisë së tij politike, është e qartë se ai i përket politikanëve të moderuar që e shohin afirmimin e idesë së një qendre qytetare dhe evropiane si vendimtare në plejadën e re të marrëdhënieve politike në Mal të Zi.
„Unë besoj fuqishëm se antifashizmi dhe trashëgimia e luftës nacionalçlirimtare duhet të mbeten një nga themelet më të rëndësishme të shoqërisë sonë,“ tha presidenti i Malit të Zi.
